Canerin məsələsi həll olunmaq üzrədir
Mövsümə iki qələbə ilə başlayan “Qalatasaray” “Nansi”nin mərkəz müdafiəçisi Abdeslam Ouaddounu transfer etmək niyyətindədir. Fransanın “L’Equipe” qəzetinin məlumatına görə, “Cim-Bom” 30 yaşlı mərakeşli futbolçu üçün qarşı tərəfə rəsmi təklif göndərib. Məlumata görə, türklər “Malaqa”, “Köln” və “Volfsburq”un da maraq dairəsində olan Ouaddou üçün fransızlara 4 milyon avro təklif edirlər. “Nansi” ilə üçillik müqaviləsi olan futbolçu İstanbula gələcəyi halda ilinə 1,5 milyon avro qazanacaq.
Əvvəllə “Fulhem”, “Renn”, “Olimpiakos” və “Valensyenn”in şərəfini qorumuş Ouaddou “Nansi”nin heyətində 2008/09 mövsümündə Fransa çempionatında 22 oyunda forma geyinib. O, həmçinin 53 dəfə Mərakeş millisinin şərəfini qoruyub və bu oyunlarda 3 qol vurub.
Bu arada, “Qalatasaray” Moskva SSKA-sının türkiyəli yarımmüdafiəçisi Caner Erkinin transferini də rəsmiləşdirmək üzrədir. Türkiyə mətbuatının məlumatına görə, “Beşiktaş”ın da maraq dairəsində olan 20 yaşlı futbolçu İstanbula köçməyə razılıq verib. “Cim-Bom”a azad agent qismində gələcək Canerin Türkiyədə ilə 1,5 milyon avro məvacib alacağı bildirilir.
2007-ci ildə “Manisaspor”dan transfer olunan futbolçu cari mövsümdə SSKA-nın heyətində Premyer Liqada 7 oyunda iştirak edib.
Sərcanın qiyməti 10 milyon avrodur
“Qalatasaray”a keçəcəyi gündəmdə olan “Bursaspor”un və Türkiyə millisinin hücumçusu Sərcan Yıldırımın transferi düyünə düşüb. Belə ki, 19 yaşlı futbolçu üçün 4 milyon avro təklif edən “Cim-Bom”un rəhbərliyi “yox” cavabı alıb. Sərcanın meneceri Metin Korkmazın açıqlamasına görə, müştərisinin qiyməti 10 milyon avrodur.
“Fənərbağça”, “Beşiktaş”, “Qalatasaray”, “Arsenal”, “Mançester Siti” və “Aston Villa”nın da maraq dairəsində olan Sərcan 2008/09 mövsümündə “Bursaspor”un heyətində Superliqada 30 oyunda 11 qola imza atıb.
Volkan Yaman “Eskişehirspor”da?
Frank Raykardın gəlişindən sonra komandadan ayrılacağı gündəmdə olan müdafiəçi Volkan Yaman karyerasını “Eskişehirspor”da davam etdirməyə yaxındır. Belə ki, Rıza Çalımbayın komandası 26 yaşlı futbolçu ilə razılığa gəlib.
2007-ci ildə “Antalyaspor”dan transfer olunan Volkan “Qalatasaray”ın heyətində 76 oyun keçirib.
Bu arada, “Qalatasaray”ın kapitanı Arda Turan İstanbulun Yeşilköy adlanan yerində 750 min dollara villa alıb.
